مكتوب في بطاقتي الشخصيه
أنا دمي سكر زي النيل
وملامحي ملامح مصريه
والنيل مرسوم جوه عروقي
وعيوني عيون فرعونيه
وخدودي جبالك وهضابك
وصوابعي صوابع عسليه
وشفايفي بإسمك موشومه
وصوتي نغم سمسميه
***
مكتوب في بطاقتي الشخصيه
الصبح انا بافطر على شوفك
وعشايا حبك يا بهيه
والليل باتمشى على شطوطك
عاشق لياليكي السحريه
والقلب معلق في هواكي
على قد ما كان عشقك ليا
***
وكمان مكتوب جوه بطاقتي
أنا مصري وأمي مصريه
مولود من جوه رحم أرضك
من طينك كحلت عينيا
والحبل السُــري كان نيلك
مفطوم على كلمة حريه
والنبض اللي يدب في قلبي
خطوات الناس رايحه وجيه
ومساجدك وكنايسك شاهد
على روح الوحده الوطنيه
مكتوب في بطاقتي الشخصيه
***
بحبــــــــــــــــــــــك يـــــا مـــــــــــــــــــــصــــــــــــــــــــــر
" مش تأليفي طبعاً "
